Beitrag von:
... ist OFFLINE
Schreiberlevel:
Forendoktor
Beiträge: 1607
User seit 23.05.2005
|  Geschrieben am 04.08.2006 um 21:35 Uhr
| Der Brunch
(Wennst Fragen hast : nicht verzagen - Gerry fragen...)
Und nun gehts los:
Mei Frau hod vor kurzm gsogt, mia miassn unbedingt aa amoi zu am Brunch geh.
"I mog koan Brunch" hob i gsogt, "und außerdem woaß i ned, wos des is"!
Sie hod gsogt, "wer heitzudog no ned bei am Brunch war, der is ned IN".
"Wenn des aso is" hob i gsogt, "dann gehma hoid, weil IN wui i scho sei".
I hob dann im Lexikon nochgschaugt, wos a Brunch übahaupt ist.
Des is Englisch und drum sogt ma "BRANTSCH", und schreim duad ma "BRUNCH".
Des Tunwort hoaßt "BRANTSCHN" und schreim duad ma "BRUNCHEN".
Es handelt se do um a Mischung aus Frühstück und Mittagessn.
Des ko wos wern, hob i mir denkt, wahrscheinli a poor oide Semmen mit
Mamalad und a Schnitzl, des wos vor Fett tropft.
Nacha samma zum "brunchen". Mit de zwoa Kinda.
Glei am Eingang der erste Schock: do muaßt zoin, bevor dass du überhaupt
ogfangt host!
32 Mark pauschal pro Erwachsener und für d'Kinda a Zehnerl pro Zentimeter
Körpergreß. Dafia Essn, Kaffä und Tee nach beliebn, unbegrenzt.
Oiso, des gähd ja guad o! 64 Mark für mi und mei Frau zoin, ohne daß i
woaß, wos i dafia kriag. D'Kinda ham's gmessn, daß's gwußt ham, wos valanga
miassn.
Und wos macht unsa Herr Sohn?
Anstatt dass er se duckt und mia a wenig beim Sparn huift, streckt er se wia
a Giraff, weil er stoiz is, dass er mit 7 Johr scho so groß is.
Von unsara Tochter mog i gor nix song. De is 11 Johr oid und hod so moderne
Schuah mit Plattform-Soin oghabt. Bei dera ham d'Schuah alloa scho oa Mark
siebzge kost. "S'nächste Moi, fois mia wieda amoi brunchen, dann kommst du
mit Sandaln" hob i zu ihr gsogt, "dass das woaßt!"
"Und wenn a Schnä liegt?" hods gfrogt. "Dann kommst barfuaß, dass d'Sandaln
ned noß wern!"
Nacha samma nei in Speisesaal. I hob ma denkt, mi drifft da Schlog.
Do war a Buffett aufbaut, so wos groß hob i in meim ganzn Lem no ned gsäng.
Der totale Wahnsinn: Hummer, Lachs, Schrimps, Kaviar.
Aba aa guade Sachan: Pressack, warma Lebakäs, Gockerlhaxn.
Und Salate. Und Obst. Und a Haufa warms Zeig: Lasagne, Cordon bleu,
Schweinsbratn mit Knödl, Pommfritz, Nudeln.
Und Nachspeisn: Schokokrem, Nusskrem, Eis und no einiges, des wos i gor ned
kennt hob. Und Kas in Massn, weil der schließt den Mong.
Ja, wenn des a so is, hob i mir denkt, dann is des wos anders!
De 32 Mark vafriß i locker und die 2 Meta 84 von de Kinda notfois aa no.
I woit glei mid am Drum Teller hi zum Buffett und wos hoin. Aba mei Frau hod
gsogt, des hod koan Stil, wenn ma glei hirennt.
Z'erscht miaß ma uns hisitzn und wos zum dringa bstelln.
Oiso guat, wennst moanst, dann bstelln ma hoid z'erscht wos.
Mia an Kaffä und d'Kinda woitn an Spezi. Des war mir dann aa wurscht.
Auf jedn Foi bin i glei danach hi ans Buffett.
Z'erscht amoi a hoibats Pfund Lachs aufn Teller naufghaut.
Weil grod beim Brunch gibt's Leid, de san dermaßn rücksichtslos und fressn
den deiern Lachs als erschts weg.
I hob ma denkt, bevor da so oana kimmt, pack i liaba den Lachs!
Zum Lachs hob i no an Heringssalat und Ranna dazua do, weil des farblich
recht guad zammapaßt, des blasse Rot vom Lachs und des kräftige Rot vom
Heringssalat.
A poor Tintnfischring siaßsauer, zwengs dem Eiweiß, und dass aa a wenig wos
Herzhafts dabei is, hob i obn drauf zwoa Scheim rotn Pressack glegt.
Und drei Brezn.
Wia des gessn war, hob i mia an Salatteller zammgricht. Zwengs de Vitamine.
Do san Salate ideal. A guads Pfund reine Gsundheit hob i aufgschlicht auf
mein Teller: Nudlsalat mit Sahne, Schweizer Wurstsalat, Eiersalat,
Fleischsalat, Käsesalat pikant.
Daß' ned zu gsund wird, no a dicke Scheim warmer Lebakäs. Und drei Brezn.
Is recht guad gwesn, der Salatteller. Do hoaßts oiwei, was gsund is, is ned
guad - so ein Schmarrn!
Auf so vui Gsundeit nauf mog ma dann wieda was Herzhafts.
Drei Gockerlhaxn in Aspik (des is a Suiz), a Pfünderl greichertn Aal und
vier Schinknröllchen mit Spargl, weil da Spargl is kalorienarm und
harntreibend.
Apropos harntreibend: I hob dann a Weißbier bstellt, obwoi des separat wos
kost hod. - Aber noch 8 Tassn Kaffä brauchst amoi wos Gscheids, sunst hauts
dir den ganzn Mong durchanand. Und außerdem: wenn d'Kinda des deierne Spezi
sauffa, nacha werd ma se ois Vata aa a Weizn genehmign kenna, oda?!
Nochm Weißbier und de Schinknröllchen hob i mir denkt, dass wos Warms
zwischndurch ned schodn kannt und bin wieder hi zum Buffett.
I hob mia a Lasagne gnomma mit Pommfritz und vorsichtshoiber no a Cordon
bleu, weil bloß no 11 do gwesn san.
Daß' ned zu exotisch werd, hob i no zwoa Scheim Schweinsbratn draufglegt
und zwoa Knödl. - De Knödl hob i eispreizn miassn, sunst hätt'ses direkt vom
Teller obeghaut. Wia i grod mid meine eigspreiztn Knödl vom Buffett weg
woit, triff i an Direktor vo meiner Bank!
I hob gmoand, i sieg ned recht. Der hod auf seim Riesnteller oa dünne
Scheim Melone und zwoa winzige Scheiberln Schinkn drauf ghabt. Sonst nix!
Der Mo zoit 32 Mark und nacha isst a a Melone. Ois Bankdirektor!
I hob zu meiner Frau gsogt, dass ma uns des genau übaleng miaßn, ob ma mia
an so an Menschn übahaupt unser Geld overtraun kenna!
Der konn mid Geld ned umgeh, der wirfts ja privat scho zum Fenster naus!
Noch de warma Speisn war i eigentle scho ziemlich satt.
Aba de guadn Desserts woit i auf jedn Foi no probiern, scho aus Prinzip, daß
i IN bin.
I hob nacha a Mischung aus vaschiedene Crems ghoit: Vanillcrem, Nußcrem,
Schokocrem. Insgesamt a schwachs Pfund. Und dazua sechs Kiwis.
Und grod wia i von da Vanillcrem auf d'Nußcrem umsteing wui, hob i speim
miaßn!
I wuis jetz ned näher beschreim, aba es is koa schena Anblick, wennst im
Restaurant kasweiß üba da Kloschüssl hängst und vor dir lieng de 32 Mark in
Naturalien.
Vielleicht is mei Bankdirektor doch ned so dumm, wia i gmoant hob...
MAHLZEIT !
--
Schöne Grüße vom See!
|
 Antworten
 Antworten mit Zitat
 E-Mail an SLK-Gerry  Moderatoren-Team informieren  Themen-Abo bestellen |
|
Geschrieben am 04.08.2006 um 22:39 Uhr 
Anonym :1074
